政治滅門無頭公案：林家血案
真濟人知影1947年發生驚天動地的228大大屠殺。33年後，殘忍的代誌繼續咧發生，知影的人煞減真濟。
代誌發生佇1980年2月28。
事件背景
欲了解案發彼工的詳細情形進前，咱著先來了解這个案件發生的時代背景。林--家血案毋是一件孤立的刑事案件，是發生佇台灣威權統治當局佮異議人士激烈衝突的背景之下。
咱共時間倒轉去案發進前幾個月：1979年12月初10，「美麗島事件」爆發，驚動國際社會。煞--落-來佇12月13，政府展開「美麗島大逮捕」，彼當時做省議員的林義雄，就佇家己的厝內予人拘提（khu-thê）--去。
到1980年2月20，警備總部軍法處以「叛亂罪」起訴包括林義雄在內的「美麗島八人」，這個罪名佇彼當時的戒嚴體制之下，有足懸的機率會hőng判死刑。
佇案發的前一工，也就是2月27，頭一擺有准家屬佮律師接見（tsiap-kiàn）hőng關押兩個月以上的被告。彼當時林義雄透過律師傳出一份mé-mooh，內容極驚--人，講伊佇偵訊（tsing-sìn）期間予人用足粗殘的手段刑，包括幾暝幾日不准伊睏、共伊舂、閣用薰屎共燙傷。
案發經過
1980年2月28，美麗島案當佇咧景美（Kíng-bé）軍法處開偵查庭。林義雄的某，方素敏（Png Sòo-bín），佮助理田秋堇（Tiân Tshiu-kín）攏佇現場關心開庭的情形。
頂晡11點30分，方素敏敲一通電話轉去厝--裡，彼个時陣是6歲的雙生仔查某囝林亭均（Lîm Tîng-kun）接--起-來，亭均佇電話中共阿母講，阿媽林游阿妹（Lîm-Iû A-muē）拄出門去做工課--矣。
到中晝12點10分至12點30分之間，方素敏閣連紲敲三通電話轉去厝--裡，煞無半个人接，伊隨感覺無啥對同。伊共厝--裡的鎖匙交予助理田秋堇，拜託伊趕緊轉去信義路的厝，看覓仔到底是發生啥物代誌。
下晡1點30分到1點49分之間，田秋堇轉去台北市信義路三段31巷16號的林--家。伊到林--家門口的時陣，深青色的地毯佮家具排列，佮伊早起出門時仝款，完全攏無各樣。田秋堇因為中晝食薟--的腹肚疼，這个時陣唯一的想法就是去伊前一暝睏的主人房歇睏一下。不而過，伊共房間門捒--開看著的光景，伊這世人攏袂當放袂記。
九歲的大漢查某囝林奐均（Lîm Huàn-kun）覆佇眠床頂，元氣全無，兩肢跤垂佇眠床邊，面色白死殺。田秋堇傱過去共伊搖一下，想欲共伊叫精神，煞聽著奐均用氣絲仔（khuì-si-á）講一句：「足疼的，你莫共我搖。」閣講有「賊仔」入來共伊揬。田秋堇對奐均的尻脊骿一下看，就發現三條利劍劍的平排刀傷，刀喙袂輸是攑手術刀切的，衫仔的纖維一點仔相拍結都無。
1點49分，田秋堇共驚惶強壓--落-來，開始敲電話討救兵。伊先敲予家己的老爸田朝明（Tiân Tiâu-bîng）醫師，紲--落-來佇1點51分敲予法律事務所，連鞭閣向大安分局報案，閣相連紲連絡馬偕病院佮119。
等救護車的這段時間，田秋堇心狂火著，急欲走揣雙生仔亮均（Liōng-kun）佮亭均的下落。伊厝內逐位走透透，連冰箱都開來看，煞揣無半項。
紲--落-來，伊行到地下室的入口。伊想欲共電火點著，發現切仔冗--去、歹--去--矣。伊慢慢仔行落烏mà-mà的樓梯，一直行到斡角，霧霧中敢若看著地下室的塗跤有一堆花花的物件。彼時伊是驚甲破膽，睏房的林奐均閣直直喊伊的名喊袂停，就毋敢閣繼續行--落-去，越頭轉去樓頂。
彼時伊猶毋知影，彼堆花花的的物件，正正就是林義雄老母已經遇害的死體。
無偌久了後，救護車趕到，田秋堇陪奐均送去仁愛病院予醫生看。
這時陣，林--家閣有三个人下落不明：林義雄的老母林游阿妹，佮彼對古錐的雙生仔姐妹——亮均佮亭均。
下晡2點左右，江春男接著田秋堇老爸田朝明醫師的電話了後，即時指派彼當時做伙的林濁水佮康文雄趕去林--家。兩个人到位了後，警方就佮in相𤆬入去室內。
佇地下室的樓梯斡角，兩人總算發現60歲的林游阿妹倒佇血窟（hueh-khut）中，已經無喘氣--矣。事後相驗（siòng-giām）發現，阿媽的身軀中13至14刀。兇手為著欲阻止伊向奐均喝聲警告，殘忍將伊的嚨喉割斷。
到這陣雙生仔姐妹猶原下落不明。
下晡2點45分，得著消息趕--轉-來的老母方素敏，頭一个反應是傱去衛理Iő-tsí-ián，叫是囡仔猶佇學校。毋過，Iő-tsí-ián煞共伊講，這對雙生仔今仔日根本就無來上課。
現場的氣氛可比是堅凍--矣。下晡3點30分，台北市刑大技正（ki-tsìng）顧鴻樁（Kòo Hông-tsiong）𤆬搜查人員，閣一擺入去地下室徹底搜揣。
佇地下室上深的一个囥間，一堆lok-kòo sok-kòo物件的烏暗角仔，兩个人總算發現失蹤足久的亮均佮亭均。這對干焦6歲的姐妹仔，攏是尻脊骿中刀，一刀就好勢--矣。兇手的手法閣準閣粗殘，而且共逐个被害人殺害了後，攏用棉被共in包--起-來，佇跤尾掖一寡錢。彼當時到現場的刑警大隊長私底下共田秋堇講，現場蓋棉被、掖「跤尾錢」的做法，佮一刀就予雙生仔姐妹死、甚至揬--入-去以後，對下爿閣抐一下的精準手路，攏顯示這是受過嚴格訓練的「職業殺手」所做的。
到遮，林--家血案的所有被害者攏總揣著--矣。
調查
隨著事件煏--出-來，執法部門即時展開一場所謂「世紀大清查」的偵辦行動。案發隔工，刑事警察局就成立「撥雲專案」小組，由局長曹極（Tsô Ki̍k）親身出馬。紲--落-來3月初，國安局指示成立「三〇七專案」負責指導研判，調查局也成立「誠公專案」專門清查特定人士。
專案小組佇初期就將兇手𤆬向「合作報復」的動機。彼當時的警備總部官員宣稱講，林義雄是所有被告中上配合、上願意供述（kiong-su̍t）的一位，進一步推論，是林義雄的口供可能對其他黨外人士不利的因端，引發對方的不滿佮殺機。閣來，血案發生佇被告律師閱覽（ua̍t/ia̍t-lám）案件紀錄了後幾工內，警方假設律師將林義雄口供中對別人不利的內容漏洩--出-去，予其他被告的家屬抑是群眾點油做記號，煞來倩兇手報復。
專案小組根據現場情形佮倖存者（hīng-tsûn-tsiá）林奐均初期的描述，畫出一个身懸量其約仔170公分、皮膚較烏、留長頭毛閣抹油的嫌犯面模仔。根據這个面模仔佮對林--家作息的了解，警方頭一个鎖定的上大嫌疑人，就是澳洲籍的學者家博。
家博（J. Bruce Jacobs）
官方鎖定家博的理由真直接，當時佇林--家附近開𥴊仔店的許女士佮厝邊許秀玉，攏向警方表示佇案發彼工中晝，看著一个鬍鬚的外國人佇門跤口揤電鈴佮入去林--家。紲--落-來警方提供幾若張相片予in指認，當中證人選出家博。考慮著家博佮林--家往來密切，警方隨將伊拘禁（khu-kìm），一直到三個月以後才放伊出--來。
何火成
到1980年8月，調查方向頭一擺轉踅。一名有精神障礙背景的查埔何火成主動向官方投書自首，暗示家己有參與血案。伊佇偵訊中會當畫出林--家的位置圖，閣描述一寡未公開的現場情節。彼當時專案小組認為，兇手會當佇現場停留80分鐘遮長，毋是共天公借膽，就是精神無正常的人才會遮敢死，毋才對何火成進行一年的偵訊，一直到1981年10月才因為證據不足放伊出--來。
艾琳達（Linda Arrigo）
最後佇1982年左右，專案小組將方向轉向政治陰謀論，鎖定施明德的某艾琳達。官方認為艾琳達捌蹛過林--家二樓，對室內間隔（king-keh）清清楚楚，加上伊進前予政府驅逐（khu-tio̍k）出境，真有可能有報復的動機。專案小組假設艾琳達佇海外計劃，閣由家博佇台灣負責執行，想欲按呢來打擊政府的名聲。
1982年鎖定艾琳達了後，官方就無閣提出具體的新嫌疑對象，案件就按呢進入長期的恬靜期，成做一个無頭公案。
偵辦過程的疑點
一个講動員百萬人、由國家級情治單位監督的專案，按怎樣會查四年，煞親像佇踅圓箍仔，甚至愈查愈離經？若是咱將尾仔解密的檔案佮當年的辦案過程疊起來看，就會發現這規場調查，充滿人為刁故意的引𤆬。
未曾有證據就確定動機
頭起先，上明顯的無合理，就是辦案人員先設定「黨外人士行兇」的假說（ká-suat），才下性命對林義雄的社交箍仔中揣瘦抽、佮外國人士來往的對象來陷害。譬論講，田秋堇女士就有講明白，九歲的林奐均精神的時是講「有賊仔入來共我揬」。結果佇官方的報告中，「賊仔」煞變成「以前捌來過厝--裡的阿叔」。檔案顯示，辦案人員咧偵訊受重傷的奐均的時陣，是共過程直直餾、直直引導閣逼問，伊才佇極大的壓力之下講出「略略仔面熟」。
另外一个例是1980年3月初4，《中華日報》刊出一篇報導，用具體到差不多是「搜底（中：肉搜）」的資訊，欲指向仝款是黨外人士的游錫堃。但是案發當工，伊規工攏佇公司上班，有實實在在的無在場證明，根本無可能有時間犯案。
另外，為著欲共「黨外人士行兇」合理化，專案小組竟然生出一个「合作報復」的動機。In對外宣稱林義雄佇偵訊中「配合甲無地比」，致使黨外同僚（tông-liâu）抾恨才落手刣人。毋過事實是林義雄彼當時當咧予人刑甲半小死，情治高層嘛完全知機，煞那共伊刑，那對外講白賊講伊真配合，欲共黨外人士戴一頂兇手的帽仔。
對林--家的監控
這个案件予人起雞母皮、嘛上無合理的疑點，就佇彼面二四小時全面監控的「天羅地網」。根據尾仔解密的檔案，情治單位對林義雄的監控自1977年就開始--矣，到案發前更加是到啥物鼻屎大的代誌攏袂落勾的地步。彼時陣包括國安局、警總、調查局佮憲兵司令部攏咧密切監控林--家。In毋但監聽電話，佇美麗島大逮捕了後，閣入去林--家內部安裝竊聽器（tshiap-thiann-khì）。也就是講，林--家幾點幾分啥人出門、佇客廳抑是電話中káng啥物，情治單位攏掌握甲一清二楚。
連案發當工拍殕仔光，林--家門跤口都有榮民身分的「相放伴員（中：守望相助員）」佇對面監視，警總保安處原本也有派人佇四箍輾轉進行所謂的「戒護」。
按呢問題來--矣：佇這款二四小時嚴密監控的環境之下，兇手是按怎共幼茈雙生仔佇厝裡的空縫掠甲準準準，當頭白日傱入去行兇，佇厝內老神在在留甲80分鐘，尾仔閣會當掛無事牌，連一个監控人員都無共閘--落-來？
神祕電話
佇案發當工下晡1點12分，就佇兇手行兇了後、田秋堇到位進前，有一名男性對林--家敲電話去台北市南京東路的金琴西餐廳，揣一位姓王的人客。這通電話真有可能是兇手作案結束了後，向藏鏡人抑聯絡人回報的關鍵資訊。
國安局的監聽紀錄有完整掠著這通電話，但是專案小組要求調閱錄音帶的時，國安局煞予人一个無法度接受的理由：彼工的錄音帶已經「沖掉」，也就是毀掉--矣。
一个二四小時嚴密監控林宅的情治體系，竟然佇案發當工上要緊的時陣，錄音帶會「意外」拍無--去？咱就按呢看著一幅怪奇的景象：情治機關一手全方面監控林--家、另外一手又閣刁工毀掉佮案件有關係的證據。
國安局𤆬警方踅玲瑯
除了將關鍵證據毀掉以外，國安局也對其他方面𤆬警方踅玲瑯。彼時負責刑事偵查的「撥雲專案」小組，拚命欲對澳洲學者家博遐揣著突破口，甚至限制伊的人身自由。但是事實上，國安局的監聽人員早就佇案發彼工中晝錄著家博對國際學舍敲予林--家雙生仔的電話。
檔案內底連監聽員的隨手筆記都猶有，明明白白寫著：「家博的確佇12:00左右電林--家佮囡仔開講」，閣註記「家博涉嫌可能無重」。這份有法律效力的「無在場證明」，竟然毋捌提供予專案小組，放警方佇錯誤的方向白了三個月的黃金偵查期。
這一切種種，攏指向一个事實：彼當時的偵辦過程，予一塊「國家不容懷疑」的天篷崁牢牢。有人刁故意對辦案人員掩崁政府咧監控林--家的事實，所有的調查方向攏予人𤆬向黨外相刣、外國勢力抑是精神病患的隨機犯案。
真正的兇手是…？
今仔日的台灣已經民主化--矣，促轉會也有做詳細的調查，甚至大量的情治檔案攏已經解密，是按怎這个案件到tann猶無法度破案？是按怎真兇的名自頭到尾無浮--出-來？
其實，這正正是這个悲劇上予人無力的所在。咱今仔日面對的是證據予時間佮人為因素拊拊掉的困境。
頭一个是消失的物證佮檔案。上關鍵的破案證據——也就是案發當工彼塊錄著兇手聲音的監聽錄音帶，佇案發了後無幾工就予國安局毀掉--矣。到2001年，Ná-lih（中：納莉）風颱做大水，淹過刑事警察局的地下室，大量關係著林--家血案的原始偵查檔案佇彼場大水中害了了--去。這意思講濟濟第一手的痕跡、證據，已經永遠消失佇歷史的大湧--矣。
第二个是蔫去的人證。這場血案離這馬已經超過40年，當年參與辦案的人員、目擊（bo̍k-kik）證人，甚至是彼寡可能知機的監控人員，大多數攏已經是老大人，或者是已經過身。促轉會捌試過訪談一寡關鍵人，但是得著的回應往往是「因為破病袂當接受訪問」抑是「細節已經袂記得--矣」。當人的記憶消失，真相嘛親像犀牛望月，愈望愈望袂著。
毋過，比起最後攑刀的彼个人，較重要的凡勢是這一切的藏鏡人、彼个下令欲共林--家滅門的人。
佇官方檔案中，真兇的名字自頭到尾攏是一塊「空白」，但是咱若將所有的疑點疊--起-來，這塊空白的形其實已經非常清楚。
這就引出民間佮見證者上深的質疑：威權核心層的政治指令。
田秋堇女士佇後--來的回憶中，將林--家血案佮1984年發生的「江南案」做對照。江南案已經證明是由情治高層結合烏道赴美暗殺異議人士。彼當時掌握情治機構的頭人，無比「蔣孝武」較顯目的名。上關鍵的線索佇伊掌握權力的時間點：蔣孝武1979年10月被拍派擔任國家安全會議（國安會）執行秘書，外界將這層代誌看做是蔣經國安排伊進入情報佮國安核心。1984年伊沓沓仔退出國安系統，1986年予人「外放」新加坡擔任駐星代表。啊拄拄仔好就佇1980到1984年間，相連紲發生林--家血案、陳文成命案、佮江南案等等戒嚴時尾的三大政治命案。
筆者必須在此強調，無一張紙直接寫著「蔣孝武」抑是某一个具體高層的名，毋過親像林義雄先生捌講過，問「兇手是啥人」有時陣傷過天真--矣。彼个威權到極的時代，會使予所有情治系統佇80分鐘內全全「青盲」，閣佇案發了後系統性掩崁證據、共調查牽去重耽的方向，這絕對毋是少數失控人員私底下的行動，是來自有最高權力、會使指揮規个國家機器的指令。
隨著關鍵證據拍毋見--去、人證老--去，林--家血案無的確會成做一个永遠的無頭公案。但是伊留予台灣社會的傷痕佮教示，已經成做咱民主轉型過程中上疼、也上掂篤的一課。