本土語言政策ê再轉型正義

【這是筆者參加2024/12/22全國台語政策論壇所做ê紀錄，經過許教授ê同意刊--出-來。本篇經過小可仔文字修改，同時刊tī台文通訊BONG報。】

這改全國台語民間會議暨台語政策論壇邀請著台灣師範大學ê許慧如教授來討論「本土語言政策ê再轉型正義」。Tī演講當中，伊提出目前台語政策ê四大問題，閣有對應ê解方。

問題一：「本土語」地位並無實際提升。

許教授首先𤆬咱來看台語ê社會地位，對戒嚴時期叫做「方言」，用政策kā壓落底；到1990年代，台語、客語、原住民語開始號做「鄉土語言」、「母語」，tī民間佮地方政府推動。2001年開始，一禮拜一節課ê鄉土語言課正式起磅；到甲2019年，國家語言發展法公佈，鄉土語言閣添台灣手語、馬祖話等，攏成做「國家語言」。對這个角度來看，台語佮其他本土語言是毋是有大發展，地位提升put-lí濟咧？

咱kā視角giú遠，看規个社會ê語言使用才會當回答這个問題。社會語言學有一个概念：「高階語言」，就是tī正式場合，包括揣頭路、教育使用ê語言；相對--ê，「低階語言」就干焦用tī非正式、私人都合ê層次。頭先講ê演變，不管名按怎改，台語其實攏無躘開「低階語言」ê身份，進入到「高階語言」。中文tī台灣絕對ê優勢，uan-nā在在在，這馬又閣加一个英語出來。台語ê資源是有愈來愈濟，但是華語佮英語kám講就無？甚至拍算增加閣khah濟咧。所以講，有華語佮英語硩tī頭頂，本土語言ê地位其實並無實際提懸。

問題二：「本土語」形式上ê「平等」，無看見台語ê通用語地位。

毋但本土語言實際ê地位無提升，本土語言內部問題嘛誠大。kā課綱thián開來看，有國（華）語文、英語文，煞看無著台語，干焦「本土語言」這个分類爾爾。這類又閣包含新住民語言，袂輸是一種「其他」類，別所在囥無路ê攏總擲來遮。台語干焦是這幾十種語言內底ê一種爾爾。

毋過若斟酌看台語tī台灣歷史上ê地位，絕對毋但按呢。日本時代1915年做ê調查，全台灣無0.03% ê人講華語，煞有85%攏講台語。其中母語毋是台語--者，嘛有將近30%會曉講台語，遠遠超過彼久日本政府欲捒ê日本話。許教授講著，大部份ê國家攏毋是干焦一種語言，毋過語言之間有「共通語」佮「族群語言」ê區別，其中共通語定定是自然形成--ê。Tī華語來台灣以前，台語就是事實上ê共通語； 客語、原住民語是族群語言。華語若無入來，現此時華語ê擔頭就是台語咧擔矣，抑若客語佮原住民語可能仝款會需要復振，這是無仝ê社會基礎。

咱愛知影台灣上大ê霸權是華語，毋thang干焦tī「本土語言」ê箍仔要求平等，落尾煞講講台語會損害著別个族群ê權利，變做「逐家攏是台灣人，所以逐家攏袂使講台灣話」，無看見台語ê社會功能是台灣ê自然通用語。

問題三：無kā「復振」和「推廣」這兩個觀念拂予清楚。

「復振」是原本有ê物件，咱欲恢復；「推廣」是原本無ê物件，欲kā捒出去。這是無仝ê目標。親像頭先講--ê，客話、原住民ê分佈是有區域性--ê，tī客庄、部落內底確實著愛復振；但是以外--ê、無社會基礎ê所在，就干焦適合做「推廣」。一个語言若是欲tī棲地以外ê所在硬欲「復振」，彼就袂輸tī無適合ê田種作，毋但收成會䆀，閣會損害著原生ê物種。

問題四：傷過強調「文化」和「傳承」，本土語言顛倒脫離日常生活。

現此時本土語言課產生ê背景，是1990年代開始推捒--ê，彼陣台語對少年人來講，雖然毋是主要語言，但是逐家猶閣攏會曉講，所以一禮拜一節ê課檢采閣有效果。這馬台語流失閣愈嚴重，若是干焦kā語言復振捒予教育部、文化部，彼算是「育、樂」，無真正tī咱「食衣住行」ê方方面面，按呢做是袂通--ê。

建議一：語言復振應該以地區做單位，毋是個人。

這馬ê本土語言課，是以人做單位。不管啥人，tī啥乜所在，準講伊有選某一種本土語言，學校就愛替伊安排彼種語言ê課程。但是親像問題三講--ê，按呢tī棲地以外ê所在做復振語言ê工課，毋但效果袂好，顛倒會去kā其他語言ê資源kheh掉。抑是譬論講，tī本底是台語通行區ê所在，想欲推捒用台語來教別科ê沉浸式教育，煞因為班--ê有人毋是台語族群做無路，閣變做頭先所講「逐家攏是台灣人，所以逐家攏袂使講台灣話」ê狀況。

若以地區做單位，咱愛有ê心態就毋是「我講某乜話，政府就應該愛提供我ê囡仔某乜話課」，應該是「我講A話，毋過生活tī B話區，我ê囡仔就上B話課，甚至老師著愛以B話教各種課程」，按呢語言推捒才會順序。

建議二：嚴肅看待台語ê「共通語」地位，規劃真正符合台灣語言生態ê語言定位佮環境。

第一步就是政府、社會ê頭人應該愛𤆬頭tī公共場合講台語，予伊真正有通用語ê功能。其實聽有台語ê人比咱所想--ê加足濟，許教授以家己ê經驗來講，現此時18歲、大學一年仔ê新生，講攏講家己聽無台語，但是實際上你若刁工kā in講台語，攏嘛加減聽有，是濟少ê問題niâ。

建議三：本土語言政策無應該侷限tī文化部佮教育部，語言必需要轉來到「食衣住行」，袂當只有「育樂」。

台灣各語言ê定位建議

下面這張圖是許教授所見，台灣語言目前ê狀況，佮咱應該愛拍拚ê目標。現狀是華語佮英語霸占高階語言ê地位，本土語言遮濟種，煞予in攏食仝一碗飯，閣愛逐个人食平濟。可比講一个25歲ê運動員，你嘛要求伊佮5歲囡仔食平濟，按呢伊呔袂勼去咧？咱ê目標應該是予逐種語言平行發展，像下跤ê圖，逐種語言對地位懸到低ê都合攏有份。Tī這个前提之下，台語成做社會ê共通語，客語、原住民族語tī in原本ê棲地內底嘛成做方方面面攏用會著ê語言。

最後許教授提醒，語言復振上重要--ê就是共伊講--轉-來，台文界真濟人咧寫文章、寫詩無毋著，毋過彼是屬「育、樂」，就算家己無彼个文彩嘛毋免餒志；tī家己生活ê每一工堅持講台語才是現此時閣khah要緊ê代誌。