初一早，初二早，初三睏甲飽

過年就欲煞矣，咱趁猶有時間來複習一下仔台灣人過年ê風俗。這條《正月調》彙集台灣民間ê講法，唸起來是án-ne：

初一早，初二早，初三睏甲飽。
初四接神，初五隔開，初六是舀肥。
初七七元，初八完全，初九天公生。
初十有食食，十一請囝婿。
十二查某囝轉來拜，十三食泔糜仔配芥菜。
十四結燈棚，十五是上元瞑。

大部份攏真淺白，毋過有ê風俗這馬較無矣，我按我佇網路頂查著ê佮逐家分享。

初四愛接神，是因為照台灣傳統ê燈猴傳說 ，初四咱已經確定台灣安全矣！咱就kā眾神迎轉來厝–ê，繼續服侍，所以初四「接神」。
初五隔開，意思是「隔開新年假期」，也就是愛kā供品收收咧，年節禁忌到這工為止ê意思。
初六舀肥，就是古早時佇這工愛kā屎礐仔ê屎尿舀起來，摒摒咧。
初七彼工閣叫做七元。我看著ê講法是臺灣人會點七支蠟燭，提果子、麵線來拜祖先、拜神明，祈求全家會當長歲壽。
初八完全，意思是講正月初八是上天眾星聚會ê時，所有星辰攏會齊到，所以這工著愛祭星，也就是祭家己本命之意，祈求保庇一年平安順序。