中部高速公路地圖

前一站仔我駛車去臺中𨑨迌。往過去臺中攏是坐車 khah 濟，tsit 改駛車，轉來看著沿路 ê 路標攏是無熟似 ê 地名，感覺真心適，嘛真好玄遮 ê 地名用台語是按怎講，順手就 kā 整理一下，做出下跤 tsit 張圖。

現此時台灣濟濟漢字地名攏是國民政府號–ê，有 ê 經過 in 認為 ê「美化」，有 ê 可能想 beh 照台語音來寫，煞寫重耽去；閣加上台語漢字本身有文白音、勾破音等等 ê 問題，定定毋是「台語好」就有法度看漢字講出台語地名，愛靠硬記才ē知。前一站仔吵甲風風火火 ê 客語路牌仔，台語到 tann 猶閣無咧。Ǹg 望有一工本土語言 ê 路牌仔變做四常 ê 代誌，咱才毋免為著了解當地 ê 地名 tsiah-nī 拍拚。

地名大部份是參考教育部辭典，另外一寡直接查查無–ê，當時仔是兩个地名敆做伙。親像「豐勢」，其實是「豐原 Hong-guân」佮「東勢角 Tang-sì-kak」相敆，按呢應當就唸做 Hong-sì，若有毋著才請有志指正。另外，圖內底圓箍仔內底拍叉「⨂」ê 所在是系統交流道，因為地名攏佮別个交流道有重複，我就無特別標出來矣。