佇法庭做證，愛簽名甘結？是啥乜意思？

前幾篇講著電視劇《無罪推定》內底講著真濟專業名詞，其中大部分 ê 處理方式是 kā 伊換做 khah 白話 ê 同義詞。按呢 ē-tàng 予 khah 濟人聽有無毋著，毋過長久來看，專業名詞 ê 台語 uân-nā 愛處理。我感覺法律名詞上好 ê 做法，是台語在來有--ê 就照用；若無--ê 就按照 tsit 久 ê 華語詞，怙漢字音照讀。按呢處理 ê 因端是 tann 法律條文攏是華語寫 ê，這咱無法度改變，若是隨人有家己 ê 翻譯 ē 造成無必要 ê 混亂。

Ē-tàng 照華語漢字來讀 ê 例，是華語字幕捌出現真濟改 ê『定讞』。戲中 ê 台語口白攏講「確定」，親像『一審定讞』，台語講「一審（判決）確定」。按呢嘛 ē 通，毋過若 beh 當做專有名詞，照《甘字典》ê 音來讀就是 tīng-hiàn。（更新：有面友提醒講其實正式 ê 法律名詞是判決確定無毋著，定讞才是俗名。）

抑若台語自底就有 thang 用 ê 詞有啥咧？佇法庭做證，攏愛簽名『具結』，tsit 个詞劇情中是翻做「簽名保證」。Kám 閣有別種講法？我進前捌聽藍春瑞老師 ê 講座，伊講 in khah 早『簽切結書』攏號做「甘結」。Tsit 號詞《台日大辭典》有收，解說講：「交涉事件結果滿意 to̍h 簽約束狀。」就是咱 tsit-má 所理解 ê『切結』無毋著。我繼續 pué 落去，看著「甘結狀 kam-kiat-tsn̄g」，解說是：「證人等提出 ê 宣誓書。」這佮頭前講 ê『具結』意思就峇峇峇矣！

所以到遮就破案矣，『切結』、『具結』ê 台語就是「甘結」，『切結書』是「甘結狀」。逐家來揣看覓仔 tsit 个詞佇戲中佗位出現咧？（絕對毋是我 pān 惰揣😆）