因為昨天整日在外，金曲獎結束後，我才在YouTube補看完。看完著實是非常開心，每年都有比前一年進步的地方。例如前年鄭宜農因為致詞只使用華語而引起了一番爭議，到今年幾乎所有台語歌手、能講台語的人都多少講了一些。希望以後原住民語、客語也能有這樣的機會。或許可以事前讓入圍者提供得獎感言，頒獎的時候有華語字幕輔助，就可以解決一些人聽不懂地問題了。但另一方面，金曲獎整體來說還是蠻華語中心的。比如華語獎項照例是放在壓軸，也是各界關注度最高的獎項。會這麼做應該有收視的考量，但或許以後除了混合語種的獎項以外，原住民/客/台/華語的頒獎順序可以有前後挪動的機會。
音樂表演，常在有彼寡毋免看樂譜、自由發揮的演出，華語叫做『即興表演』，台語愛按怎講咧？參考台語社團的討論，有三種講法攏真值得分享予逐家：
① A-tóo-lí-buh
這个詞是對拉丁語的「ad libitum」（隨意）來的，傳到英語叫做「ad-lib」，尾仔凡勢閣對日語「アドリブ」入來到台語。值得咱注意的是，日語毋若有アドリブ的講法，嘛有講「即興そっきょう」。根據 ChatGPT 的講法（歹勢我日語程度猶無夠），「即興」包含的意思較闊，啊若アドリブ通常是咧講音樂性的表演，而且アドリブ人聽起來的感覺較 moo-tn̄g。就我所知，台語 a-tóo-lí-buh 的用法嘛相 siāng 。
【這是筆者參加2024/12/22全國台語政策論壇所做ê紀錄，經過許教授ê同意刊--出-來。本篇經過小可仔文字修改，同時刊tī台文通訊BONG報。】
這改全國台語民間會議暨台語政策論壇邀請著台灣師範大學ê許慧如教授來討論「本土語言政策ê再轉型正義」。Tī演講當中，伊提出目前台語政策ê四大問題，閣有對應ê解方。
許教授首先𤆬咱來看台語ê社會地位，對戒嚴時期叫做「方言」，用政策kā壓落底；到1990年代，台語、客語、原住民語開始號做「鄉土語言」、「母語」，tī民間佮地方政府推動。2001年開始，一禮拜一節課ê鄉土語言課正式起磅；到甲2019年，國家語言發展法公佈，鄉土語言閣添台灣手語、馬祖話等，攏成做「國家語言」。對這个角度來看，台語佮其他本土語言是毋是有大發展，地位提升put-lí濟咧？
華語佮台語的量詞真無仝，我家己共台語抾轉來的過程，拄著量詞嘛定定khê-khê。最近看著《話山話水話玲瓏》咧講量詞，感覺按呢的討論誠讚，下跤就整理這條影片內底講著的，逐家罔參考！
過年就欲煞矣，咱趁猶有時間來複習一下仔台灣人過年ê風俗。這條《正月調》彙集台灣民間ê講法，唸起來是án-ne：
初一早，初二早，初三睏甲飽。
初四接神，初五隔開，初六是舀肥。
初七七元，初八完全，初九天公生。
初十有食食，十一請囝婿。
十二查某囝轉來拜，十三食泔糜仔配芥菜。
十四結燈棚，十五是上元瞑。
大部份攏真淺白，毋過有ê風俗這馬較無矣，我按我佇網路頂查著ê佮逐家分享。
相信逐家最近攏有看著咱台灣英雄佇野球場 ê 表現，實在是蓋精彩。因為按呢，我拄好來整理一寡野球相關 ê 台語。
整理 ê 過程中，我有幾項仔心適 ê 發現。第一是歷史佮語言密切 ê 關係。台語野球 ê 術語有大量來自日本話 ê 外來語，日本話閣是對英語借過來--ê， 台灣野球 ê 源頭對遮就看甲明明明矣。
閣來是日語 ê 外來語愛轉寫做台文 ê 時陣，拄--著 ê 一寡挑戰。當中 ê 鋩角 put-lí 濟，佇遮我就干焦講做法，無解說背後 ê 考量，若有機會 tsiah 另外寫一篇來講。
前一站仔我駛車去臺中𨑨迌。往過去臺中攏是坐車 khah 濟，tsit 改駛車，轉來看著沿路 ê 路標攏是無熟似 ê 地名，感覺真心適，嘛真好玄遮 ê 地名用台語是按怎講，順手就 kā 整理一下，做出下跤 tsit 張圖。
用聽--ê khah 利便：
咱人咧指稱台羅拼音抑是白話字 ê 字母，常在去用英語 ê 字母名來稱呼，像講 a, b, c 就呼 /eɪ/, /bi/, /si/，按呢落去（用//鋏起來 ê 符號攏是國際音標IPA，若毋捌 ê 朋友 ē-sái 暫時 kā 當做是 KK 音標抑是台羅）。
不而過，咱若去看別種語言有採用拉丁字母--者，攏有 in 家己稱呼字母 ê 方式。歐洲語言像德語、法語就免講，就算是 khah 近代才採用拉丁字母 ê 語言，親像越南語、甚至是中國 ê 漢語拼音攏是怙家己 ê 名咧稱呼拉丁字母，毋是 /eɪ/, /bi/, /si/ 按呢咧叫。比論講漢語拼音 kā a 唸做ㄚ、o 唸做ㄛ、 e 唸做ㄜ、i 唸做一、u 唸做ㄨ等等--ê。
前幾篇講著電視劇《無罪推定》內底講著真濟專業名詞，其中大部分 ê 處理方式是 kā 伊換做 khah 白話 ê 同義詞。按呢 ē-tàng 予 khah 濟人聽有無毋著，毋過長久來看，專業名詞 ê 台語 uân-nā 愛處理。我感覺法律名詞上好 ê 做法，是台語在來有--ê 就照用；若無--ê 就按照 tsit 久 ê 華語詞，怙漢字音照讀。按呢處理 ê 因端是 tann 法律條文攏是華語寫 ê，這咱無法度改變，若是隨人有家己 ê 翻譯 ē 造成無必要 ê 混亂。
幾禮拜以前，我去日本拜訪我上好 ê 朋友 Khá-mē-khooh。前一站仔我佮一个名叫做切（Tshiat） ê 查埔囡仔有咧行。尾仔想 beh 佮伊扯，伊煞毋放我煞，四界偷偷仔 kā 我綴。Tsit 久想講予家己放一个假，kā 遮 ê 破事捒甲遠遠遠。我是足期待 tsit 斗 ê 旅行，一--來我從來毋捌去過別个國家（其實啥乜所在攏罕得行跤到啦），二--來，自阮大學畢業以後，我已經倚 beh 五年毋捌看過 Khá-mē-khooh--looh。伊回國以後捌佇東京蹛--一-站-仔，in 阿媽過身了後，伊分著阿媽 ê 厝，離大崎市（Tāi-kiā-tshī）量其約仔二十公里。彼是 in 家族仔傳承幾若代 ê 祖厝，我看著伊傳 ê 相片，嘛足歡喜 ē-tàng 蹛著遮好勢 ê 厝。
伊駛車來機場載我。阮拄見面就攬一下，閣 lā-lē 幾分鐘，káng 甲足歡喜--ê，尾仔才往伊 ê 車 kiânn。伊看起來就佮往過仝款——伶俐、笑詼、閣活潑——毋過 tsit 个人我知知啦。阮對庄跤 ê 美景駛--過 ê 時，我就看 ē 出伊 kán-ná 咧煩惱啥。伊不時咧比講遮有啥貨足 khú--ê（『酷』）、抑是 tsit 搭歷史按怎，láu 甲我攏開始好玄，遮 ê 代誌佮名是毋是伊編--ê。我佇心內暗笑家己呔 ē 按呢想。等伊講到一个坎站，我就 kā 問講最近 kám 攏順序。